Joh 16 | MED | STEP | “Enim nga mondpa pili ei, ropa mbuⱡ mbaⱡ iti nᵾtangga nᵾmp kᵾn, enim ik mbᵾ kundᵾp nᵾt.

John 16

1 “Enim nga mondpa pili ei, ropa mbuⱡ mbaⱡ iti nᵾtangga nᵾmp kᵾn, enim ik mbᵾ kundᵾp nᵾt. 2 Enim atinga manga ila, ui nᵾweing nᵾk, enim rok pep ruing. Wote, wamp mat ndi, enim rok kondᵾk kᵾn, Got nga uⱡ kun kai ti, endᵾnmᵾn nᵾk piling, ui ei nondpa onum. 3 Uⱡ mbᵾ enim kᵾn iting. Ei nambuⱡ emel, Wuta kep, na kep, pilik mbi ndui nandᵾrmᵾn. 4 Wote na ndi, enim ik mbᵾ, unt kundᵾp nit. Wote, uⱡ mbᵾ pemba ei nga, ui ei, ekit om kᵾn, enim ndi, kundᵾp nᵾnt ik mbᵾ, wote molk piling. Enim ik mbᵾ, unt kundᵾp ni nᵾndᵾt. Ei nambuⱡ emel, na enim kᵾn kunda murmᵾn.

Muⱡnga Wingti Nga Kongun Etᵾm Mel

5 Wote akup, na tᵾpa mundrum puⱡ wu ei kᵾn punt. Wote, enim kᵾⱡ nga ti ndi, na waldᵾk nᵾk mel, ‘Nim nant ila pun?’ nᵾk, ni naninmin. 6 Ei nambuⱡ emel, enim ik kundᵾp nᵾnt nimbᵾ nga, enim munt mindil tᵾnmᵾn. 7 Wote, ik kupa ei, enim kundᵾp nᵾnt. Na enim nga nindᵾp, enim wak rop mbi. Wote, na pi nᵾpᵾnt ndam, enim Tᵾpa Rapᵾndᵾmba Wamp ei, ui nawᵾmba. Wote na punt ndam, enim Tᵾpa Rapᵾndᵾmba Wamp ei, enim kᵾn tᵾp mundimp. 8 Wote, wamp ei om kᵾn, mᵾi kona wamp mbᵾ nga uⱡ kit etmin mbᵾ kᵾn, uⱡ kun kai etmin mbᵾ kᵾn, wote Got nga wamp mbᵾ kᵾmp tᵾmba. 9 Wote akup ei kᵾn, uⱡ kit mbᵾ etᵾk mormᵾn. Ei nambuⱡ emel, na mondᵾk pili napilik mormᵾn. 10 Uⱡ kun kai mbᵾ, tᵾpa pena ila pendᵾmba. Ei nga, na Wuta kᵾn punt. Wote, na kᵾni nᵾkᵾning. 11 Got nga wamp mbᵾ, kᵾmp tᵾtᵾm uⱡ ei, wote tᵾpa pena ila pendᵾmba. Nambuⱡ emel, mᵾi kona uⱡ kit etmin mbᵾ nga wu peng ei, tᵾpa mana ndurum.

12 Na nimp ik puⱡi petᵾm. Ei nga wote, akup enim pilik tᵾk, kapⱡa indi nᵾnding. 13 Wote, Muⱡnga Kupa ei om kᵾn, enim nombuⱡa kupa kun kai ila, tᵾpa kun mundᵾmba. Elim nga numan ila, ik ti oⱡa tᵾpa ni nanᵾmba. Uⱡ wote, pemba mbᵾ nga pilpa kandpa etᵾm ei mel nimba. 14 Na nga ik mbᵾ, tᵾpa enim kundpa nimba. Nambuⱡ emel, uⱡ ei ndi, na nga mbi ei, tᵾpa ou ndupa, paka rondᵾmba. 15 Wuta nga mel mbᵾ pora, na nga. Ei nga, na ndi, nᵾmp kᵾn, na nga ik mbᵾ, Muⱡnga ei ndi, tᵾpa enim kundpa nimba.

16 Ui onunga wei kot ila, na kᵾni nᵾkᵾning. Wote, aldpa ui onunga wei kot ila, na kᵾning,” nitim. 17 Kitip kᵾni wu ni kᵾⱡ ndi, en enim nᵾk mel, “Ui onunga wei tila na kᵾni nᵾkᵾning. ‘Wote ui onunga wei kot ila, na aldpa kᵾning,’ ninim. Wote, aldpa tᵾn kundpa, ‘Na Wuta kᵾn mbi,’ ninim. Ei, etpa ninim mel nant nda? 18 Wote, ui onunga wei kot ninim ei, etpa ninim mel nant nda? Ik ninim ei nga puⱡ ei, tᵾn pilip rundᵾnmᵾn,” nᵾtᵾng. 19 Jisas elim wuldᵾng pilik, etᵾng ei nga, pilpa nimba mel, “‘Ui onunga wei kot ila, na kᵾning. Wote, ui onunga wei kot ila, na aldpa kᵾni nᵾkᵾning’ nᵾnt. Ik ei nga, en enim tek rombulk nᵾnmin ei? 20 Enim ik kupa ei, kundᵾp nᵾnt. Enim ka etᵾk, moⱡangina kᵾn, wote mᵾi kona wamp mbᵾ ndi, ambulk palk muⱡing. Enim mindil nok muⱡangina, wote numan kai piling uⱡ ei, ekit omba. 21 Amp ti, kangambuⱡa memba ui ei, nondpa elinga, kangambuⱡa mbuⱡ rorum. Wote, mepa tᵾpa kᵾn, mindil norum uⱡ ei, tᵾpa apra ndupa, na nga kangambuⱡa ti, mᵾi kona ila mint nimba, numan ndi korum. 22 Ei mel ku, akup, enim munt mindil enim. Wote, na enim kᵾnt ei kᵾn, enim nga numan orunga ambuⱡpa pᵾl uⱡ ei pemba. Ambuⱡpa pᵾl uⱡ ei, wamp ti ndi, roldpa ti natᵾmba.

23 Wote ui ei, ekit om ei kᵾn, enim ndi, na kᵾn mel ti mawa iti nᵾting. Na ik kupa ei, enim kundᵾp nᵾnt. Na nga mbi tek angᵾndᵾk, Wuta kᵾn mawa eng ei mel pilpa ngumba. 24 Unt ui ei kᵾn, omba akup ui ila, enim ndi, na nga mbi ila, mel ti mawa iti natᵾtᵾng. Mawa etᵾk kᵾn, mel ti tᵾng ei kᵾn, enim nga numan orunga, ambuⱡpa pᵾl uⱡ ei, peka ropa pemba.

25 “Na nᵾt ik mbᵾ, ik ek rop, enim kundᵾp nᵾt. Wote, ui ti om kᵾn, enim ik ek rop, ni nᵾnimp mon! Na ndi, Wuta nga ik kun ei, enim kᵾn para ndup nimp. 26 Wote ui ei, ekit om kᵾn, enim ndi, na nga mbi tek angᵾndᵾk, Wuta kᵾn atinga rong ndam ting. Ei nᵾmp kᵾn, na ndi, enim nga nindᵾp Wuta kᵾn atinga rundimp ni nanᵾnt. 27 Nambuⱡ emel, Wuta elim ndi, enim numan ngurum. Ei nambuⱡ emel, enim ndi, na numan ngᵾk, na Got kᵾn moⱡᵾp, mana ur nᵾk mondᵾk pᵾtmᵾn. 28 Na Got kᵾn moⱡᵾp, ya mᵾi kona ila mana ur. Wote akup, ya mᵾi kona wak rop, Wuta kᵾn mbi,” nitim.

29 Wote, kitip kᵾni wu ni kᵾⱡ ndi, nᵾk mel, “Akup nim ik ek rui narkᵾn, ik kun mint nᵾn. 30 Akup tᵾn pᵾnmᵾn ei, nim uⱡ mbᵾ nga pora pilkᵾn ketᵾn, wamp ti ndi, nim ik mat waldpa, ni nanᵾmba. I en uⱡ ei ndi, nim Got kᵾn molkᵾn urᵾn nimbun, nim mondᵾp pilip mormᵾn,” nᵾtᵾng. 31 Wote Jisas ndi, punt ropa, nimba mel, “Enim ndi, na akup mondᵾk pᵾnmᵾn ye! 32 Ui ti omba ei, akup kor om. Enim ndi, na wak rok, mbuⱡ mbaⱡ nᵾk, elpa elpa mang kona ping. Na mendpᵾⱡ mondᵾk, kelik ping. Wote, na mendpᵾⱡ muⱡi nᵾmbᵾⱡimp. Nambuⱡ emel, Wuta na kᵾn morum. 33 Na enim ik i etᵾp kundᵾp nᵾnt. Ei ndi, enim nga numan ei, na kᵾn tiyangina, wang nangga. Enim mᵾi kona uⱡ mbᵾ ndi, etpa mindil kundᵾmba. Wote, enim ronduⱡ mundᵾk muⱡᵾi! Ya mᵾi kona uⱡ kit mbᵾ, na ndi, rop mana ndunt,” nitim.